తెలుగు భాగవత తేనె సోనలు – 10.1-184-ఆ. ఏమినోముఫలమొ

10.1-184-ఆ.

ఏమినోము ఫలమొ యింత ప్రొ ద్దొక వార్త

వింటి మబలలార! వీను లలర

మన యశోద చిన్నిమగవానిఁ గనె నట

చూచి వత్త మమ్మ! సుదతులార!

          ఓ సుందరమైన చెలులారా! ప్రొద్దునే లేస్తూనే ఇంత మంచి శుభవార్త చెవులార విన్నాం, ఏనాడు నోచిన నోముల ఫలితమో గానీ; మన యశోదమ్మ చిన్న పాపడిని కన్నదట. చూసి వద్దాం సుందరీమణులు! రండి రండి.

     నందనందనుడు పుట్టిన సందర్భంలో అనేక వేడుకలు, ఉత్సవాలు చేసుకుంటోంది గోకులం. ఆ పురిటికందును చూడటానికి గోపిక లిలా వొకరినొకరు లేపుకుంటు ఉత్సాహంగా బయలుదేరారు.

10.1-184-aa.

aeminOmu phalamo yiMta pro ddoka vaarta

viMTi mabalalaara! veenu lalara

mana yaSOda chinnimagavaani@M gane naTa

choochi vatta mamma! sudatulaara!

          ఏమి = ఎట్టి; నోము = వ్రతములు నోచిన; ఫలమొ = ఫలితముగనో; ఇంతప్రొద్దు = ఇప్పటికి; ఒక = ఒకానొక; వార్తన్ = శుభ వార్త మానమును; వింటిమి = విన్నాము; అబలలార = ఇంతులూ {అబల - బలము తక్కుగా ఉండునామె, స్త్రీ}; వీనులు = చెవులు; అలరన్ = ఆనందించగా; మన = మన యొక్క; యశోద = యశోద; చిన్ని = చంటి; మగవాని = మగపిల్ల వాడిని; కనెను = ప్రసవించెను; అటన్ = అట; చూచి = చూసి; వత్తము = వచ్చెదము; అమ్మ = అమ్మ; సుదతులార = సుందరీమణులారా {సుదతి - మంచి పలువరుస కలామె, అందగత్తె}.

http://telugubhagavatam.org/?tebha&Skanda=10.1&Ghatta=21&Padyam=184

సర్వేజనాః సుఖినోభవంతు|~~~